കോഴിക്കോട്: പ്രശസ്ത ജനറല് സര്ജനും കോഴിക്കോട് പി.വി.എസ് ഹോസ്പിറ്റൽ എം.ഡിയുമായ ഡോ. ടി. കെ. ജയരാജ് (82) അന്തരിച്ചു. കോഴിക്കോട് തളി 'കല്പക'യിൽ ആയിരുന്നു താമസം. 2006 മുതല് മാതൃഭൂമി ഡയറക്ടറാണ്.
കോഴിക്കോട് ഗവ. മെഡിക്കല് കോളേജില് നിന്ന് എം.ബി.ബി.എസ്. ബിരുദവും മുംബൈ ജി.ടി.യില് നിന്ന് എം.എസും നേടിയ ജയരാജ് കേരള ഗവ. സര്വീസില് അസിസ്റ്റന്റ് സര്ജനായാണ് ജോലിയിൽ കയറിയത്. 1965 മുതല് 1974 വരെ വിവിധ സര്ക്കാര് ആശുപത്രികളില് അസിസ്റ്റന്റ് സര്ജനായി പ്രവര്ത്തിച്ചു. 1976 മുതൽ കോഴിക്കോട് പി.വി.എസ്. ഹോസ്പിറ്റലിന്റെ നേതൃത്വത്തിൽ അദ്ദേഹമുണ്ടായിരുന്നു. എളിയ നിലയിൽ തുടങ്ങിയ സ്ഥാപനത്തെ മൾട്ടി സൂപ്പർ സ്പെഷ്യാലിറ്റി ഹോസ്പിറ്റലാക്കി വളർത്തുന്നതിൽ നിർണ്ണായകപങ്കു വഹിച്ചു. രാജ്യാന്തര തലത്തിൽ നടന്ന മെഡിക്കൽ സമ്മേളനങ്ങളിൽ പ്രബന്ധങ്ങൾ അവതരിപ്പിച്ചിട്ടുണ്ട്. രാജ്യാന്തര ജേണലുകളിൽ പ്രബന്ധങ്ങൾ പ്രസിദ്ധീകരിച്ചിട്ടുമുണ്ട്.
അസോസിയേഷൻ ഓഫ് സർജൻസ് ഓഫ് ഇന്ത്യ ഭരണ സമിതിയംഗം, കേരള ചാപ്റ്റർ പ്രസിഡന്റ്, സെക്രട്ടറി, ഇന്ത്യൻ മെഡിക്കൽ അസോസിയേഷൻ കോഴിക്കോട് ബ്രാഞ്ച് പ്രസിഡന്റ്, കാലിക്കറ്റ് യൂറോളജി ക്ലബ് പ്രസിഡന്റ്, റോട്ടറി ക്ലബ് ഓഫ് കാലിക്കറ്റ് ഈസ്റ്റ് പ്രസിഡന്റ്, ജില്ലാ വോളിബോൾ അസോസിയേഷൻ പ്രസിഡന്റ് തുടങ്ങിയ ചുമതലകൾ വഹിച്ചിട്ടുണ്ട്.
തൃശൂർ ജില്ലയിലെ വലപ്പാട്ട് മലബാർ ഡിസ്ട്രിക്ട് ബോർഡിൽ സ്കൂൾ അദ്ധ്യാപകനായിരുന്ന എടമുട്ടം തണ്ടയം പറമ്പിൽ കുഞ്ഞുകൃഷ്ണന്റെയും കാർത്ത്യായനിയുടെയും മകനായി 1939 ജൂലൈ ഏഴിനാണ് ജനനം. കെടിസി സ്ഥാപകനും പ്രമുഖ വ്യവസായിയുമായ പി. വി. സാമിയുടെ മകൾ കുമാരി ജയരാജാണ് ഭാര്യ. മക്കൾ: ഡോ. ജെയ്സി ബൈജു (ഹാർട്ട് ആൻഡ് വാസ്കുലാർ കെയർ, ഫ്ലോറിഡ, യുഎസ്), ഡോ. ദീപ സുനിൽ (പിവിഎസ് ഹോസ്പിറ്റൽ, കോഴിക്കോട്), ഡോ. ജയ്കിഷ് ജയരാജ് (ഡയറക്ടർ, പിവിഎസ്. ഹോസ്പിറ്റൽ), ഡോ. ദീഷ്മ രാജേഷ് (പിവിഎസ് ഹോസ്പിറ്റൽ). മരുമക്കൾ: ഡോ. പ്രദീപ് ബൈജു (ഹാർട്ട് ആൻഡ് വാസ്കുലാർ കെയർ, ഫ്ലോറിഡ, യുഎസ്), ഡോ. സുനിൽ രാഹുലൻ (ദുബായ്), ഡോ. ആര്യ ജയ്കിഷ് (പിവിഎസ് ഹോസ്പിറ്റൽ), ഡോ. രാജേഷ് സുഭാഷ് (പിവിഎസ് ഹോസ്പിറ്റൽ).
സഹോദരങ്ങൾ: സാവിത്രി (ഫറോക്ക്), സതി (അയ്യന്തോൾ), പരേതരായ ഡോ.ടി.കെ.രവീന്ദ്രൻ (കാലിക്കറ്റ് സർവകലാശാല മുൻ വൈസ് ചാൻസലർ), ഗംഗാധരൻ (വിമുക്തഭടൻ), ബാലകൃഷ്ണൻ (റിട്ട. പ്രിൻസിപ്പൽ, ഗവ. കോളജ്, ചാലക്കുടി), സുരേന്ദ്രൻ (റിട്ട. ഇന്ത്യൻ റവന്യൂ സർവീസ്), സരോജിനി, സരസ്വതി. മാതൃഭൂമി ചെയർമാനും മാനേജിങ് എഡിറ്ററുമായ പി.വി.ചന്ദ്രൻ, മുഴുവൻ സമയ ഡയറക്ടറും ചലച്ചിത്ര നിർമാതാവുമായ പി.വി.ഗംഗാധരൻ എന്നിവർ ഭാര്യാസഹോദരന്മാരാണ്.
ഒരു അഭിപ്രായം പോസ്റ്റ് ചെയ്യൂ