മഴ മാറി, നീരൊഴുക്ക് കുറഞ്ഞു; ഇടുക്കി ഡാമിന്റെ രണ്ട് ഷട്ടറുകള് അടച്ചു.
ഇടുക്കി: മഴ മാറി, അണക്കെട്ടുകളിലേക്കുള്ള നീരൊഴുക്ക് കുറഞ്ഞതോടെ സംസ്ഥാനത്തെ അണക്കെട്ടുകള് അടയ്ക്കുന്നു. ഇടുക്കി ഡാമിന്റെ രണ്ട് ഷട്ടറുകള് അടച്ചു. രണ്ടാമത്തെയും നാലാമത്തെയും ഷട്ടറുകളാണ് താഴ്ത്തിയത്. മൂന്നാമത്തെ ഷട്ടര് 40 സെന്റി മീറ്റര് ആയി ഉയര്ത്തും. പുറത്തേക്ക് ഒഴുകുന്ന ജലം സെക്കന്റില് 40,000 ലിറ്റര് ആയി കുറക്കാനാണ് തീരുമാനം. മഴ കുറഞ്ഞ സാഹചര്യത്തിലാണ് ഇടുക്കി ഡാമിലെ ഷട്ടറുകളടച്ചതെന്നും മഴ കൂടിയാല് ഷട്ടര് വീണ്ടും തുറന്ന് ജലനിരപ്പ് ക്രമീകരിക്കുമെന്നും മന്ത്രി റോഷി അഗസ്റ്റില് അറിയിച്ചു. നിലവില് നീരൊഴുക്കിനെക്കാള് ജലം ഒഴുക്കി കളയുന്നുണ്ടെന്നും അദ്ദേഹം അറിയിച്ചു. 'മഴക്കെടുതിയില് അപകടത്തില്പ്പെട്ട എല്ലാവരുടെയും മൃതദേഹം കിട്ടിയെന്നാണ് നിഗമനം. ദുരിതാശ്വാസ ക്യാമ്പിലെ കുട്ടികളുടെ കാര്യത്തില് പ്രത്യേക പരിഗണന ഉണ്ടാകും'. മുല്ലപ്പെരിയാര് ഡാമിന് നിലവില് അപകടമൊന്നുമില്ലെന്നും ആശങ്ക വേണ്ടെന്നും മന്ത്രി കൂട്ടിച്ചേര്ത്തു.
സംസ്ഥാനത്ത് നിലവില് മഴ കുറഞ്ഞെങ്കിലും അലര്ട്ടുകളില് മാറ്റമില്ല. തെക്കന് തമിഴ്നാട് തീരത്ത് രൂപപ്പെട്ട ചക്രവാതച്ചുഴി കാരണം സംസ്ഥാനത്ത് വ്യാപകമായി ഇടി മിന്നലോട് കൂടിയ മഴ ഉണ്ടാകുമെന്നാണ് കാലാവസ്ഥാ നിരീക്ഷണ കേന്ദ്രം അറിയിക്കുന്നത്. നാല് ദിവസത്തേക്കാണ് മുന്നറിയിപ്പ്. കൊല്ലം മുതല് വയനാട് വരെ 10 ജില്ലകളില് യെല്ലോ അലേര്ട്ടാണ്. മത്സ്യത്തൊഴിലാളി മുന്നറിയിപ്പ് ഇല്ല.
ഒരു അഭിപ്രായം പോസ്റ്റ് ചെയ്യൂ