കരിപ്പൂർ സ്വർണ്ണക്കടത്ത് കേസ് : കൊടുവള്ളി സ്വദേശി ബെംഗളൂരുവിൽ കസ്റ്റഡിയിൽ.
കൊണ്ടോട്ടി: കരിപ്പൂർ സ്വർണ്ണക്കടത്ത് കേസുമായി ബന്ധപ്പെട്ട് കൊടുവള്ളി സ്വദേശിയെ ബെംഗളൂരുവിൽ നിന്ന് പ്രത്യേക അന്വേഷണസംഘം പിടികൂടി. കൊടുവള്ളി സ്വദേശി മുഹമ്മദ് ബഷീർ (ചന്നൻ ബഷീർ- 47) ആണ് പിടിയിലായത്. കേസിൽ ഉൾപ്പെട്ട കൊടുവള്ളി സ്വദേശികളായ പ്രതികൾക്ക് ബെംഗളൂരുവിൽ ഒളിവിൽ കഴിയാനും മറ്റും സഹായംനൽകിയത് ഇയാളാണെന്ന് കണ്ടെത്തിയതിനെ തുടർന്നാണ് അറസ്റ്റ്.
ബെംഗളൂരു കേന്ദ്രീകരിച്ച് കൊടുവള്ളിയിലേക്ക് കുഴൽപ്പണം കടത്തുന്ന സംഘത്തിലെ പ്രധാനിയാണ് ഇയാൾ. ബെംഗളൂരുവിലെ സേട്ടുമാരിൽ നിന്ന് പണമെടുത്ത് കൊടുവള്ളിയിൽ സുരക്ഷിതമായി എത്തിക്കാൻ ഒരു സംഘം തന്നെ ഇയാൾക്കു കീഴിലുണ്ട്. ഒരുലക്ഷം രൂപയ്ക്ക് 100 രൂപയാണ് ഇയാളുടെ കമ്മീഷൻ. കോടിക്കണക്കിന് രൂപയാണ് ഒരേസമയം വാഹനത്തിൽത്തന്നെ ഇവർ കടത്തുന്നത്.
ബെംഗളൂരുവിൽ പോലീസ് പിടികൂടുന്ന ആളുകളെ ജാമ്യത്തിൽ ഇറക്കാനും ഇയാളുടെ നേതൃത്വത്തിൽ സംഘം പ്രവർത്തിക്കുന്നുണ്ട്. ഇയാളുടെ ഫോൺ പരിശോധിച്ചതിൽ സ്വർണ്ണക്കടത്ത് കേസിലെ പ്രതികൾക്ക് ജയിലിൽ പ്രത്യേക സൗകര്യം ചെയ്തു കൊടുക്കാൻ ജയിൽ ഉദ്യോഗസ്ഥരെ ഇയാൾ സ്വാധീനിച്ചതിന്റെ വിവരങ്ങൾ അന്വേഷണസംഘത്തിന് ലഭിച്ചു.
കൊടുവള്ളി സ്വദേശിയെ തട്ടിക്കൊണ്ടു പോയി കൊലപ്പെടുത്താൻ ശ്രമിച്ചതുമായി ബന്ധപ്പെട്ട് മുഹമ്മദ് ബഷീറിന്റെ പേരിൽ കേസുണ്ട്. കൂടുതൽ അന്വേഷണത്തിനും തെളിവെടുപ്പിനുമായി ഇയാളെ കസ്റ്റഡിയിൽ വാങ്ങും. ഇതോടെ കേസുമായി ബന്ധപ്പെട്ട് അറസ്റ്റിലായവരുടെ എണ്ണം 46 ആയി. ജില്ലാ പോലീസ് മേധാവി സുജിത്ത്ദാസ്, ഡിവൈ.എസ്.പി. കെ. അഷ്റഫ് എന്നിവരുടെ നേതൃത്വത്തിലാണ് പ്രത്യേക അന്വേഷണ സംഘം കേസന്വേഷിക്കുന്നത്
ഒരു അഭിപ്രായം പോസ്റ്റ് ചെയ്യൂ