കോവിഡ് വ്യാപനം: ഇതര രോഗങ്ങളുള്ളവർ ആരോഗ്യ പരിശോധന നടത്തണമെന്ന് ഡി.എം.ഒ
കോട്ടയം ജില്ലയില് കോവിഡ് ടെസ്റ്റ് പോസിറ്റിവിറ്റി നിരക്കും രോഗികളുടെ എണ്ണവും ഗണ്യമായി വര്ദ്ധിച്ചു വരുന്ന സാഹചര്യത്തില് പ്രമേഹവും രക്താതിമര്ദ്ദവും ഉള്ളവര് ഇവ അനിയന്ത്രിതമായ നിലയിലല്ലെന്ന് ഉറപ്പാക്കണമെന്ന് മെഡിക്കല് ഓഫീസര് ഡോ. ജേക്കബ് വര്ഗീസ് അറിയിച്ചു. ഇതിനായി അടിയന്തരമായി പരിശോധനയ്ക്ക് വിധേയരാകണം.
രക്തത്തിലെ പഞ്ചസാരയുടെ അളവും രക്തസമ്മര്ദ്ദവും ഉയര്ന്ന നിലയിലാണെങ്കില് ചികിത്സ തേടണം.
ജില്ലയില് 18 വയസിനു മുകളിലുള്ളവരിൽ എണ്പതു ശതമാനത്തോളം പേര് ഒരു ഡോസ് വാക്സിൻ സ്വീകരിച്ചിട്ടുണ്ടെങ്കിലും രക്തത്തിൽ പഞ്ചസാരയുടെ അളവ് കൂടിയവർക്കും രക്താതിമർദ്ദം ഉള്ളവര്ക്കും കോവിഡ് ബാധിച്ചു കഴിഞ്ഞാൽ ഗുരുതര നിലയിലാകുന്നതായി കണ്ടെത്തിയിട്ടുണ്ട്. ഇവർക്ക് ആശുപത്രി ചികിത്സ വേണ്ടി വന്നേക്കാം.
വാക്സിന് സ്വീകരിച്ചവരില് രക്തത്തിലെ പഞ്ചസാരയുടെ അളവും രക്ത സമ്മർദ്ദവും നിയന്ത്രണവിധേയമാണെങ്കില് കോവിഡ് ബാധ ഗുരുതരമാകാനുള്ള സാധ്യത കുറവാണ്. കോവിഡ് ബാധിച്ച് വീടുകളില് ചികിത്സയിൽ കഴിയുന്നവരില് പ്രമേഹവും രക്താതിമര്ദ്ദവും ഉള്ളവര് സുരക്ഷാ മാനദണ്ഡങ്ങൾ പാലിച്ച് തദ്ദേശ സ്ഥാപനത്തലത്തിലുള്ള ഡോമിസിലിയറി പരിചരണ കേന്ദ്രത്തിലോ അടുത്തുള്ള സി.എഫ്.എല്.ടി.സിയിലോ എത്തി പരിശോധന നടത്തണം.
പ്രമേഹവും, രക്താതിമർദ്ദവുമുള്ളവര് കൃത്യമായ ഇടവേളകളിൽ ആരോഗ്യ പരിശോധന നടത്താതെ സ്ഥിരമായി കഴിക്കുന്ന മരുന്നുകള് തുടരുന്നത് ഒഴിവാക്കണമെന്നും ഡി.എം.ഒ നിര്ദ്ദേശിച്ചു.
ഒരു അഭിപ്രായം പോസ്റ്റ് ചെയ്യൂ