പാല്‍, തൈര് വിൽപ്പനയിൽ റെക്കോർഡിട്ട് കേരളം.

പാല്‍, തൈര് വിൽപ്പനയിൽ റെക്കോർഡിട്ട് കേരളം.

കോഴിക്കോട്: സർവകാല റെക്കോർഡ് സൃഷ്ടിച്ച് ഓണക്കാലത്തെ പാൽ വിൽപ്പന. മിൽമ രൂപീകരിച്ച ശേഷം ഇതാദ്യമായാണു കേരളത്തിൽ ഇത്രയേറെ പാലും തൈരും വിൽപ്പന നടത്തിയത്. പായസത്തിനും മറ്റാവശ്യങ്ങൾക്കുമായി തിരുവോണനാളിലെ ഉപയോഗത്തിന് മലയാളികൾ വാങ്ങിയത് 36 ലക്ഷം ലിറ്റർ പാലാണ്. കഴിഞ്ഞ വർഷം ഇത് 31 ലക്ഷം ലിറ്റർ ആയിരുന്നു.

      തൈരിന്റെ വിൽപ്പനയിലുമുണ്ട് ഗണ്യമായ വർദ്ധന. 3.60 ലക്ഷം കിലോ തൈരാണ് തിരുവോണ നാളിലേക്കായി കേരളത്തിൽ മിൽമ വിറ്റഴിച്ചത്. കഴിഞ്ഞ വർഷം ഇത് 3 ലക്ഷം ആയിരുന്നു. കേരളത്തിലെ പ്രതിദിന പാൽ ഉൽപാദനം 15 ലക്ഷം ലിറ്റർ ആയിരിക്കെ, ഏറെ ആസൂത്രണത്തോടെയാണ് ആവശ്യകതയെ മിൽമ നേരിട്ടത്.

കർണാടകയിൽ നിന്ന് 10 ലക്ഷം ലിറ്റർ പാലും തമിഴ്നാട്ടിൽ നിന്ന് 1.5 ലക്ഷം ലിറ്റർ പാലും വാങ്ങി. അതോടൊപ്പം ഓണത്തോട് അടുത്ത ദിവസങ്ങളിലെ പാൽ സംഭരണത്തിന്റെ അളവും കൂട്ടി. ഈ രീതിയിൽ 10 ലക്ഷം ലിറ്റർ പാൽ ആഭ്യന്തരസംഭരണം നടത്തിയാണ് തിരുവോണനാളിലെ ആവശ്യം നിറവേറ്റിയത്.

ഓരോ മേഖലയിലെയും പാലിന്റെയും തൈരിന്റെയും വിൽപന:-

മലബാർ-13.95 ലക്ഷം ലിറ്റർ പാൽ, 1.95 ലക്ഷം കിലോ തൈര്.

എറണാകുളം-12.8 ലക്ഷം ലിറ്റർ പാൽ, 95,000 കിലോ തൈര്.

തിരുവനന്തപുരം-9.86 ലക്ഷം ലിറ്റർ പാൽ, 73,000 കിലോ തൈര്.