തൊഴിലുറപ്പ് തൊഴിലാളികള്ക്ക് ഇടിമിന്നലേറ്റു.
പത്തനംതിട്ട: തൊഴിലുറപ്പ് തൊഴിലാളികള്ക്ക് ഇടിമിന്നലേറ്റു. ഏനാദിമംഗലം പഞ്ചായത്തിലെ ഒന്പതാം വാര്ഡില് കുറുമ്പകര കാട്ടുകാല കോളനി ഭാഗത്ത് തൊഴിലുറപ്പ് ജോലി ചെയ്തു കൊണ്ടിരുന്ന അഞ്ചു തൊഴിലാളികള്ക്കാണ് ഇടിമിന്നലേറ്റത്.
ഇന്നലെ വൈകിട്ടായിരുന്നു സംഭവം. പൊള്ളലേറ്റ ഇവരെ അടൂര് ജനറല് ആശുപത്രിയില് പ്രവേശിപ്പിച്ചു. മഴക്കുഴി നിര്മ്മാണത്തില് ഏര്പ്പെട്ടു കൊണ്ടിരിക്കുമ്പോഴാണ് മിന്നലേറ്റത്.
ഇടിമിന്നല് അപകടകരമായതിനാല് പൊതുജനങ്ങള് മുന്കരുതല് എടുക്കണമെന്ന നിര്ദ്ദേശമുണ്ട്. ഇടിമിന്നലിന്റെ ആദ്യ ലക്ഷണം കണ്ടുകഴിയുമ്പോള് തന്നെ സുരക്ഷിതമായ കെട്ടിടത്തിനുള്ളിലേക്ക് മാറുക. തുറസ്സായ സ്ഥലങ്ങളില് തുടരുന്നത് ഇടിമിന്നലേല്ക്കാനുള്ള സാധ്യത വര്ദ്ധിപ്പിക്കും. കേരളത്തില് ഇടിമിന്നലോടു കൂടിയ ഒറ്റപ്പെട്ട മഴയ്ക്ക് സാധ്യതയുള്ളതിനാല് ജാഗ്രതാ നിര്ദ്ദേശം പുറപ്പെടുവിച്ചു. ഞായറാഴ്ച വരെ മഴയ്ക്ക് സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്. ഉച്ചക്ക് 2 മണി മുതല് രാത്രി 10 മണിവരെയുള്ള സമയങ്ങളില് ഇടിമിന്നലിനുള്ള സാധ്യത കൂടുതലാണെന്നും മുന്നറിയിപ്പുണ്ട്.
إرسال تعليق